ഓണക്കാലത്ത് നാട്ടിൽ പോകുവാൻ ആഗ്രഹിക്കുന്ന യൂറോപ്പിലെ പ്രവാസികൾക്ക് സന്തോഷവാർത്ത. ഓഗസ്റ്റ്, സെപ്റ്റംബർ മാസത്തിൽ കൊച്ചിയിൽനിന്നും ലണ്ടനിലേക്കും തിരിച്ചും അഞ്ചോളം നേരിട്ടുള്ള സർവീസുകളാണ് ലഭ്യമാവുക. എയർ ഇന്ത്യ ഫ്ലൈറ്റ് ആഗസ്റ്റ് 28 , സെപ്റ്റംബർ 4, 11, 18, 25 തിയതികളിൽ കൊച്ചിയിൽനിന്നും ലണ്ടനിലേക്കും ആഗസ്റ്റ് 29, സെപ്റ്റംബർ 5, 12, 19, 26 തിയതികളിൽ തിരിച്ച് കൊച്ചിയിലേക്കും സർവീസ് നടത്തും. വന്ദേ ഭാരത് മിഷൻ മാനദണ്ഡങ്ങൾ പാലിച്ചായിരിക്കും സർവീസ് നടത്തുന്നത്. ഈ താല്കാലിക സർവീസിലേക്ക് എയർ ഇന്ത്യ ടിക്കറ്റ് ബുക്കിംഗ് ആരംഭിച്ചിരിക്കുകയാണ്. നേരിട്ടുള്ള സർവീസ് ആയതിനാൽ ലണ്ടനിൽ നിന്നും 10 മണിക്കൂറുകൊണ്ട് നാട്ടിലെത്താം.
കൺസർവേറ്റീവ് പാർട്ടി നേതാവും ബ്രിസ്റ്റൊളിലെ ബ്രാഡ്ലി സ്റ്റോക്ക് കൌൺസിൽ മുൻ മേയറുമായ ടോം ആദിത്യ, ലണ്ടനിൽ സോളിസിറ്ററായ ഷൈമ അമ്മാൾ തുടങ്ങിയവരുടെ നിരന്തര ശ്രമഫലമായാണ് കൊച്ചിയിലേക്കുള്ള ഡയറക്ട് ഫ്ലൈറ്റ് എന്ന സ്വപ്നം യാഥാർഥ്യമായിരിക്കുന്നത്. ഈ സർവീസ് വിജയകരമായാൽ ഭാവിയിൽ സ്ഥിര സർവീസിനുള്ള സാധ്യത വർദ്ധിക്കും.
Kerala Globe News